Nagpasalig ang pamunuan sang Department of Agrarian Reform sa probinsya sang Negros Occidental nga pagabuligan nila ang nabilin nga pamilya sang ginpatay nga Senior Agrarian Reform Technologist sang Department of Agrarian Reform (DAR)-Negros Occidental sa Purok Sandia, Barangay Mambaroto, Sipalay City, Negros Occidental alas-8:35 subong nga aga.
Ang biktima ang ginkilala nga si Andre Marie Pajarillo, 57 anyos kag anay Punong Barangay sang Barangay East Proper, Candoni, Negros Occidental.
Sa interview sang Bombo Radyo Bacolod kay Diona M. Molina, Chief Administrative Officer sang Department of Agrarian Reform-Negros Occidental, indi nila pagpabay-an ang nabilin nga pamilya ni Pajarillo kag siguruhon man nila nga ang tanan nga nahimuan sini sa departamento ang indi mapabay-an.
Samtang, suno kay Molina wala sila sang nabaton nga report nga may yara sang pamahog kay Pajarillo antes pa man ang insidente.
