Gin-athag sang Department of Education (DepEd) nga indi sakop ang mga pampubliko nga eskwelahan sang 4-day workweek nga ipatuman umpisa Marso 9.
Suno kay DepEd Sec. Sonny Angara, magapadayon ang klase sa mga pampubliko nga buluthuan sa kinaandan nga lima ka adlaw kada semana sa pihak sang bag-o nga pagsulondan para sa pila ka mga talatapan sang gobyerno.
Apang mahimo nga ipatuman sang DepEd ang apat ka adlaw nga trabaho para sa ila mga opisina.
Ang 4-day workweek gin-anunsyo ni President Ferdinand Marcos Jr bilang isa ka tikang agud masabat ang ginapaabot nga pagtaas sang presyo sang langis tuga sang tensyon sa Middle East. Tinutuyo sang polisa nga mabuhinan ang konsumo sang gatong kag kuryente sa mga building sang gobyerno.
Suno sa Memorandum Circular No. 114, ang mga ahensya sang gobyerno mahimo magpatuman sang isa ka gin-compress nga apat ka adlaw nga iskedyul sang trabaho sa lugar ukon magdesignar sang isa ka adlaw para sa work-from-home kada semana.
Samtang, nagapahanumdom naman ang DepEd sa mga pampubliko nga buluthuan nga maghiwat sang simple nga graduation kag moving-up ceremonies para sa school year 2025–2026. Ginsulit sang departamento ang ila “no collection” nga polisa, nga naga-engganyo sa mga eskwelahan nga indi magsukot sang sobra nga balayran para sa mga graduation rites.
