Marso 30 kag 31 lamang ang petsa sang graduation ceremonies nga gintalana sa Department of Education division of Negros Occidental.
Sa interview sang Bombo Radyo Bacolod kay DepEd Negros Occidental Spokesperson Ian Arnold Arnaez, bangod may iban nga eskwelahan nga wala na sang klase sini nga semana, iban ang nagpatigayon na sang ila nga recognition ceremony.
Pahanumdom sini nga madugay na ang ‘no collection policy’ sang DepEd angot sa graduation.
Suno kay Arnaez, ang mga graduation expenses ang covered na sa maintenance and other operating expenses (MOOE) sang kada eskwelahan.
Suno diri, sa MOOE, may ara nga natalana nga budget para sa kada estudyante.
Karun nga tuman na ang pagsaka sang presyo sang tanan, dapat man nga maghimo sang mga tikang agud nga makakinot sa paggamit sang budget sang gobyerno.
Gani ginapahanumdom na sa mga eskwelahan nga indi pwede ang garboso nga aktibidad, indi mangin pabug-at sa ginikanan, apang mangin memorable gihapon para sa mga kabataan.
Ginacongratulate man sini ang mga estudyante bangod ini ang bunga na sang ila pila ka tuig nga pagtinguha agud mangin-alamon.
Suno kay Arnaez, indi kinahanglan nga mag-arkila sang de-aircon nga venue, sa baylo sarang ini nga patigayunon sa covered court sang eskwelahan ukon sang Barangay.
Kinahanglan man nga mabanta ang oras sang graduation sa tion nga indi na tuman ka init.
Nagapati si Arnaez nga may mga plano na ang mga eskwelahan nga may dako nga numero sang magagradwar agud indi tuman ka magab-ihan antes matapos ang aktibidad.
Suno diri, nalagas sang tagsa ka eskwelahan ang required number sang class days, bangod apisar nga may mga kanselasyon sang in-person classes, recorded gihapon nga class days kun nagpatigayon sang alternative delivery mode.
Sumugod sa Abril 1 tubtob 30, indi naman matandog sang DepEd ang mga manunudlo, apang sumugod sa Mayo 1, sila ang sarang na nga mapatawag kun kinahanglan kaangay sa mga pagpatigayon sang trainings kag seminars.
Ang School Year 2026-2027 ang magasugod naman sa Hunyo 8.
Samtang, wala sang balayran kag wala sang dapat nga amutan ang mga ginikanan para sa graduation sang ila nga kabataan.
Ini ang pahanumdom ni Lila Vaflor Arro, ang public information officer sang Department of Education Division of Bacolod City.
Suno kay Arro, antes paman ang krisis nga tuga sang gyera sa Middle East, ginamando na sang DepEd nga indi pwede ang extravagant graduation.
Ang moving up ukon completion ceremony sang Grade 6 kag Grade 10 sa Bacolod ang ginschedule sa Marso 30; samtang ang graduation rites sang Grade 12 ang patigayunon sa Marso 31.
Pahanumdom sini nga wala sang dapat bayaran ang mga ginikanan bangod may-ara sang budget allocation para sa kada graduates sa idalom sang maintenance and other operating expenses (MOOE).
Pahayag ni Arro nga may-ara gid ini sang mga nagakabatun nga reklamo tuhoy sa pagpanukot, nga masami ginatuga sang mga ginikanan nga luyag gid sang garboso nga graduation rites para sa ila kabataan.
Pahanumdom sini nga sa fully airconditioned kag arkilado nga venue ang graduation, samtang ginapanugyan man nga likawan ang hardbound souvenir program.
Hingyo sini sa mga ginikanan nga magkooperar.
Dugang pa sini nga indi kinahanglan magpatigayon sang baccalaureate activity sa mga malayo nga lugar kag indi man kinahanglan nga magtoga ang mga graduates.
Panugyan sini nga mag-uniform na lamang ukon sunday dress sa graduation agud indi unfair para sa iban.
Pahanumdom ni Arro nga kaangay sa kasal nga mahimo nga wala sang gasto, sarang man ini nga mahimo sa graduation.
