Ginpahayag sang spokesperson sang Department of Education-Negros Island Region nga sa Negros Occidental lamang ang may yara sang record nga Hand Foot and Mouth Disease (HFMD).
Sa interview sang Bombo Radyo Bacolod kay Almyr Ceazar Dequinia, ang report lang nga nabaton sini ang sa eskwelahan lamang sang EB Magalona, Negros Occidental apang wala sang recorded sa Negros Oriental kag Siquijor.
Suno kay Dequinia, ang eskwelahan nga may kaso sang HFMD ang mahimo magkanselar sang klase.
Suno diri nagakoordinar naman sila sa Department of Health kag bangud nga nagkanselar sang klase nagsaylo ang mga estudyante sa alternative delivery mode agud nga mapadayon ang pagtuon sang mga ini kag naghatag man ang DepEd sang Emergency Learning Kits para sa mga estudyante.
Magahatag man ang mga sang ihibalo sa mga ginikanan, mga manunudlo kag mga estudyante agud nga malikawan ang paglapta pa sang nasambit nga balatian.
Suno diri, nahangpan sang mga ini ang concerns sang mga ginikanan bangud sa nasambit nga balatian apang ginpasiguro sang mga ini nga ang Department of Education nga nagahimo sang tikang agud nga matapna ang problema bangud prayoridad sang mga ini ang ikaayong lawas sang mga estudyante gani ginsunod sang mga ini ang mando sang alkalde sang EB Magalona nga kanselahon ang face to face classes.
Magapadayon man ang pagtuon sang mga estudyante kag nagapanawagan man ini sa mga ginikanan nga monitoron ang mga kabataan kun may yara sang sintomas kag ireport gilayon.
Nagpanugyan man ini nga umpisahan sa balay ang prevention paagi sa frequent handwashing kag ugalion ang mangin matinlo agud malikawan ang paglapta sang balatian.
