Ginpasiguro sang pamunuan sang Department of Education-Negros Island Region nga antes pa man ang pag-umpisa sang klase nagpagwa na sila sang memorandum para sa hilway nga pagbalik sang mga estudyante sa eskwelahan.
Ini ang kasunod sang natabo nga pagpangluthang sang duha ka menor de edad sa San Jose National High School, Tacloban City.
Sa interview sang Bombo Radyo Bacolod kay Almyr Dequiña, ginapatuman sang DepED-NIR ang zero tolerance sa bisan ano nga sahi sang kalakasan kag bullying sa mga eskwelahan.
Suno kay Dequiña, antes pa man ang pagbukas sang klase nagpagwa ang pamunuan sang DepED-NIR sang regional memorandum 546 series of 2026 para sa safe nga pagbalik sang mga kabataan sa eskwelahan.
Suno diri, nakaemphasize sa memorandum nga dapat siguruhon sang mga Schools Division Office, nga ang mga estudyante ang dapat maproteksyunan sa bisan ano nga sahi sang abuse, violence, exploitation, discrimination, bullying kag iban pa nga sahi sang pagpang-abuso.
Dugang pa sini para masiguro nga maproteksyunan ang mga kabataan may yara ang eskwelahan nga ginbutang nga Child Protection Committee kag Learner Protection Officer.
Bilang kabahin sang kampanya, required ang mga eskwelahan nga palantawon ang mga estudyante sang film entries nga ginhimo sang Division Offices para sa anti-bullying.
Ginpasiguro ni Dequiña nga sa Deped NIR ginauna ang safety sang mga estudyante.
Panugyan sini sa mga estudyante nga magpalab-ot sa ila ginikanan kag guardian sang ila mga problema kag sa mga ginikanan ukon guardian, dapat pamatian ang mga ginadangop sa ila sang mga kabataan.
