BACOLOD CITY — Liwat nga nagpahanumdom ang opisyal sang Department of Education nga likawan ang garboso nga moving up ceremonies kag graduation rites sang mga eskwelahan subong nga nagahilapit na ang pagsira sang klase.
Sa interview sang Bombo Radyo kay Schools Division Superintendent Cynthia Demavivas sang DepEd Division of Bacolod City, ginamandu sang DepEd Order No. 8 series of 2017 ang pagpatigayon sang simple apang makahulugan kag halandumon nga graduation rites.
Sa idalom sang amo nga order, wala sang dapat nga bayaran ang mga ginikanan bangud may yara sang nakap-ain nga pondo para sa sini nga aktibidad nagikan sa maintenance and other operating expenses (MOOE) sang eskwelahan.
Suno kay Demavivas, may yara sang 250 pesos nga naka-budget sa MOOE para sa tagsa ka graduate kag ini ang natalana para sa mga balaklon para sa graduation.
Ginpahanumdom man sini ang mga manunudlo nga indi na mag-require sang toga kundi maggamit na gid lamang sang uniform.
Suno kay Demavivas, kinahanglan sang mga maestra kag maestro nga magsunod sa DepEd Order agud nga wala sang may magreklamo.
