Ginahanda na ang kaso nga infidelity in the custody of prisoners para sa desk officer kag jailer sang Bacolod City Police Station 3, matapos makapalagyo ang apat ka priso kaina alas 12:45 sang kaagahon.
Sa interview sang Bombo Radyo Bacolod kay Police Lieutenant Colonel Ariel Pico, spokesperson sang Bacolod City Police Office, ginpahayag sini nga detained na sa Bacolod City Police Station 3 si Police Corporal Orweyn Jade Nadado ang Desk Officer kag Police Staff Sergeant Eric Olverio ang Jailer kag ipaidalom sa inquest proceeding santo sa mando ni BCPO Director Colonel Henry Biñas para sa ipasaka nga kaso.
Nahibaluan nga ginkilala ang mga nakapalagyo kanday Sunny Capa , Ely Lorence, 22 anyos, single pareho nga residente sang Purok Mahimulaton, Brgy. Banago, Bacolod City, Michael Peñoso, 25 anyos, single sang Purok Sigay, Brgy.2, Bacolod City , pareho nga nagapangatubang sang kaso sa paglapas sang Republic Act 9165 ukon Comprehensive Drugs Act of 2002 kag si Jeffrey Elangos, 38 anyos, kasado, kag residente sang Purok Riverside, Brgy. Banago, Bacolod City nga nagapangatubang sang kaso nga paglapas sa Republic Act 7610 ukon Anti -Child Abuse Act.
Sa karun padayon pa ang man hunt operation sa mga nakapalagyo.
Suno kay Pico, dako ang salabton ni Police Major Ruel Culanag bilang hepe kag magapangatubang ini sang kaso nga neglecting of Command responsibility apang padayon pa ang imbestigasyon kag ginahulat pa ang paathag ni Culanag tuhoy diri.
Dako naman nga palamangkutanun sa opisyal kun paano nakapuga ang mga priso.
Nagpanawagan man ini sa mga nakapalagyo nga magsungka agud indi na madugangan ang mga kaso sini.
Dugang pa ni Pico, padayon man ang pag-coordinate nila sa Women and Children Protection Desk bangud ang isa sa nagpuga ang may kaso nga Child Abuse.
Suno pa diri, madamo man nga government agencies ang sarang nga makadakop sang mga ini, indi lang ang kapulisan.
Nagpasalig man ini sa mga nakapalagyo nga wala sang may matabo sa ila kun magsungka gilayon sa otoridad.
