Magluwas sa indignation rally nga patigayunon sa Setyembre 21, ang Diocese of Bacolod ang magapatigayon man sang prayer rally sa Setyembre 26.
Sa interview sang Bombo Radyo Bacolod kay Fr. Julius Espinosa, director sang Caritas Bacolod Social Action Foundation Incorporated, kaangay sa indignation rally, ini ang sahi man sang pagpanawagan sa gobyerno batok sa malala nga kurapsyon.
Ini ang sabat sang Diocese of Bacolod sa balatyagon kag hibubun-ot sang mga tumuluo kag katawhan.
Kun sa diin pinaagi sa simbahan, mahatagan sila sang venue agud mapahayag ang ila hibubun-ot kag kaakig.
Suno kay Espinosa, ini nagapakita nga madamo sang opsyon ang simbahan nga sarang mahimo agud mapabatyag sa gobyerno ang panawagan sang kadam-an nga mga Pilipino.
Apang indi kaangay sa indignation rally, nga typical nga sahi sang rally-protest, sila ang magapatigayon sang malinong nga prayer rally agud pangamuyuan ang sitwasyon sa karun sang pungsod.
