Ginkumpirmar sang aktres nga si Carla Abellana nga “officially divorced” na ang ila status sang iya anay bana nga si Tom Rodriguez.
Suno sa 38-anyos nga aktres, ang divorce decree nga nakuha ni Tom nga isa ka American citizen ang ginkilala sang local court sang Pilipinas duha ka tuig matapos nga gin-finalize ini sa Estados Unidos.
Madumduman nga binulan matapos ang ila pagbulagay, nagpadulong si Tom sa Estados Unidos sang Marso 2022 kag ginkumpirmar ang divorce sang Hunyo sang pareho nga tuig.
Sang Pebrero 2023 naman, ginpahayag ni Carla nga nag-file na ini sang petition sa korte sa Pilipinas agud nga kilalahon ang nasambit nga divorce decree.
Wala sagihapon sang aktres ginpakigbahin ang rason sang ila pagbulagay apang ginpahayag sini nga napatawad na niya ang anay bana sini apang indi sini makalimtan ang natabo.
Madumduman nga pito ka tuig ang relasyon nanday Carla kag Tom, na-engage sang Oktubre 2020, nagpakasal sa Madre de Dios Chapel, Tagaytay Midlands sa Talisay, Batangas sang Oktubre 23, 2021 apang wala nagdugay kag gin-anunsyar ang pagbulagay sang Hunyo 2022.
