Priso ang isa ka doktor sa Negros Occidental matapos iya ginbuyayaw ang mga pulis nga nagabantay sa check-up point sa border sang Bacolod kag Talisay kahapon bangud wala ini ginpahanugutan nga makasulod sa ciudad.
Ginpaparahan sang mga pulis ang isa ka Medical Officer 3 kag residente sang Sagay City, Negros Occidental agud pamangkuton kun sa diin ini makadto.
Sang ginpahayag sang doktor nga magapakay-o ini sang bike sa Bacolod kag indi man official duty ang iya kadtuan, wala ini ginpahanugutan sang mga pulis nga makadiretso diri sa ciudad.
Diri na ginbuyayaw sang doktor ang mga pulis gani siya ang ginposasan.
Sa interview sang Bombo Radyo kay Bacolod City Police Office spokesperson Police Lt. Col. Ariel Pico, ginpahayag sini nga ang doktor ang dapat makahibalo sang mga patakaran nga ginapatuman sa tunga sang Enhanced Community Quarantine ukon ECQ agud mapunggan ang paglapta ang coronavirus disease 2019 (COVID-19).
Suno kay Pico, indi nagakaangay nga buyayawon na lamang sang doktor ang police personnel nga yara nagabantay sa border sang ciudad bangud sa pagpamilit sini nga makasulod bangud sa personal nga rason.
Dugang pa sini, ginarisgo sang mga pulis ang ila kabuhi nila agud masiguro nga mabantayan ang nagagwa sulod sa ciudad.
Magapangatubang sang kaso nga paglapas sa Article 359 sang Revised Penal Code ukon oral defamation kag paglapas sa Article 151 ukon disobedience to persons in authority.
Sa karun, padayon nga nakahunong sa Police Station 3 ang nasambit nga doktor
