Pilason ang driver kag backrider sang motorsiklo matapos gin-arado ang railings sa bahin sang Lacson-Lizares Street, Bacolod City alas-12:45 kaina sang kaagahon.
Ang mga biktima ang ginlakipan sang driver nga si Julius Daging, 45 anyos, residente sang San Lorenzo, Brgy Tangub; kag Christian Tacuya, residente sang Brgy Mansilingan, Bacolod City.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, ang mga biktima nga lunsay yara sa impluwensya sang makahulubog nga ilimnon ang nagabyahe gikan sa sur padulong sa norte nga dereksyon.
Ginalantaw nga bangod sa kahulugbon, wala nila natalupangdan ang steel barriers sa dalan.
Suno kay Bonilla, pila ka semana pa lamang sang ginbutang sang Bacolod Traffic and Transport Management Department (BTTMD) ang mga steel barriers sa lugar.
Ang driver ang nag-angkon sang injury sa ulo samtang ang backrider ang nag-angkon naman sang minor injuries sa natuo nga paa kag kamot.
Ang duha ang parehas nga wala nakasuksok sang helmet, kag wala man sang may nakita nga dokumento sang motorsiklo.
Ang mga biktima ang gindala man gilayon sa Corazon Locsin Montelibano Memorial Regional Hospital para sa nagakaigo nga pagbulong.
