Ginbawian gid sang kabuhi ang driver sang motorsiklo nga nakabunggo sa tricycle kag mini canter truck sa Lacson St, Barangay Mandalagan, Bacolod City alas-3:40 kaina sang kaagahon.
Nahibaluan nga duha ka magkasunod nga vehicular accident ang nagluntad sa dalan Lacson, Barangay Mandalagan, Bacolod City kaina sang kaagahon.
Sa interview sang Bombo Radyo kay Police Staff Sergeant Richard Dema-ala, imbestigador sang Bacolod Police Station 3, ang una nga aksidente ang nagluntad alas 3:40 sang kaagahon sa atubang sang bag-o tukod nga bar malapit sa Concentrix BPO company kun sa diin tatlo ka mga salakyan ang imbolbado.
Suno kay Dema-ala, nagikan sa ilimnan ang driver sang motorsiklo nga si Lemuel Lumawag, 25-anyos residente sa Purok Sambag, Barangay Mandalagan kag nagbyahe padulong sa south apang liwat nga nagbalik sa north nga madasig ang pagpadalagan.
Nagikan sa sur padulong norte, didto sini nabungguan ang isa ka tricycle kag naulamid naman ang Isuzu nga mini canter truck.
Nakaangkon sang damage ang tricycle kag minor injuries sa driver sini samtang naglupok naman ang nawala nga guma sang canter truck apang wala nasamaran ang tag-iya.
Yara sa kritikal nga kondisyon si Lumawag bangud sa injury sa ulo sang ini ang gindala sa Corazon Locsin Montelibano Memorial Regional Hospital (CLMMRH) kun sa diin ini ang gindulaan sang kabuhi.
Samtang suno kay Dema-ala, ang ikaduha nga aksidente ang nagluntad sa unhan lamang sang gintabuan sang una nga insidente kun sa diin ginaalegar ginhit and run sang driver sang pick-up ang tricycle driver nga nabungguan sini.
Suno sa imbestigador, nagasunod ang pick-up nga initially nagaduag grey, sa tricycle nga ginamaneho ni Jonathan Belano, 50-anyos, residente sang Purok Pine Tree, Barangay Bata, Bacolod City padulong norte sang iya nabungguan ang tricycle.
Ginaalegar nga hit and run ang natabo bangud wala nagpondo ang driver sang pick-up kag ginlagas pa ini sang isa ka tricycle apang madasig ang iya pagpadalagan.
Nakaangkon sang pilas sa nagkalain-lain nga bahin sang lawas si Belano apang conscious naman ini samtang ginabulong.
Suno kay Dema-ala, si Belano kag ang tricycle driver nga imbolbado man sa una nga aksidente ang mag-abyanay.
