Pilason ang driver sang motorsiklo sa nagluntad nga pagbunggu-anay sa isa ka kotse sa dalan Lacson, sa atubang sang Sta Clara Subdivision sa Brgy Mandalagan, Bacolod City kaina sang kaagahon; kun sa diin nagpalagyo ang gina-alegar hubog nga driver sang kotse.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, wala pagid nila matumod kun paano nagluntad ang aksidente sa tunga sang blue nga Honda Click kag Volkswagen.
Sa karun ginapatsekyar pa ang CCTV footage sa area.
Ang biktima nga ginkilala lamang nga si Alyas Diomedes, residente sang Brgy Dulao, Bago City, ang nag-angkon sang samad sa ulo kag collar bone, nga sa karun ginabulong sa isa ka pribado nga ospital.
Suno sa mga nakakita, matapos ang aksidente, nagdulog pa ang driver sang salakyan, apang sang makita nga nalipungan ang biktima, dali dali man ini nga nagsulod sa salakyan kag madasig ini nga ginpadalagan.
Ginpinsar pa sang mga pumuluyo nga ini ang nahadlok lamang nga masapotehan, kag magasungka man sa kapulisan, apang wala gid sang may nagsungka.
Sa pihak sini, nakuha naman ang plaka sang Volkswagen nga FAH 4809.
Nagkoordinar naman ang kapulisan sa Land Transportation Office agud mapadal-an sang showcause order ang tag-iya sang salakyan.
Suno sa imbestigador, yara sa impluwensya sang makahulubog nga ilimnon ang driver sang kotse.
