Patay ang driver sang Multicab matapos mahulog ang ila ginasakyan sa taytay sa Purok 4, Tinabunan Bridge, Brgy. Man-uling banwa sang Cauayan, Negros Occidental sang Domingo sang gab-i, Disyembre 15.
Ginkilala ang napatay kay Rodulfo Trinidad Pulgan, legal ang edad residente sa banwa sang Hinoba-an.
Sa interview sang Bombo Radyo Bacolod kay Police Corporal Johnson Recto, assistant traffic investigator sang Cauayan Municipal Police Station, nagabiyahe halin sa norte padulong sa south nga direksyon ang multicab sang nadulaan sang control ang driver pag-abot sa lugar sang insidente.
Suno kay Recto, nakabunggo sa railings sang taytay ang multicab kag na-overshoot ini sa nasambit nga taytay kun sa diin gintunaan sang pagkahulog sini sa suba.
Nagataas naman sang kapin 15 meters ang taytay.
May nakita nga pilas guya kag paa sang biktima.
Ginsalom pa sang mga kapulisan ang suba agud makuha ang identification card sang biktima kun sa diin nakita nga residente ini sang banwa sang Hinoba-an gani ginpahibalo ang Hinobaan Municipal Police Station.
Nakapadulong naman sa Cauayan ang pamilya sang biktima.
Ginalantaw nga mahimo nga napiyungan ang driver bangud sa kalawigon sang biyahe sini rason nga naaksidente ini.
