Patay ang driver matapos maheart attack samtang yara sa byahe sa J Pitong corner Bonifacio Street, Brgy IV, Silay City, alas-11:30 kahapon sang aga, samtang naarado naman sini ang isa ka salakyan kag tatlo ka motorsiklo.
Ang driver nga si Alyas Dan, 65 anyos, residente sang Employee subdivision, Brgy Mambulac, Silay City nga nagadala sang gray nga Ford Ranger ang ginapahayag nga gin-atake sa corazon samtang nagadrive gani nadulaan sang control sa salakyan.
Natabuan naman nga nagalabay sa intersection ang vehicle 2 nga gray nga Mitsubishi Xpader nga ginamaneho ni Alyas Annie, 49 anyos, babayi, residente sang Prk Sunset, Brgy E. Lopez, Silay City nga nagabyahe sa halin sa Bacolod-Silay Airport padulong sa Rizal Highway.
Nabungguan ni Dan ang salakyan ni Annie, kag ini ang wala pa nagdulog tubtob nga nakatabok sa pihak nga lane kun sa diin nagalabay naman ang matte gray nga Yamaha Mio nga motorsiklo nga ginadala ni Alyas Joel, 25 anyos, residente sang Prk Rizal, Brgy Talaban, Himamaylan City.
Nagasunod kay Joel ang Honda Click nga ginamaneho ni Alyas June, 40 anyos, residente sang Tres Fuentes Street, Brgy. Lantad, Silay City, nga may backrider nga si Alyas Marie, residente sang Brgy Tangub, Bacolod City, nga kasubong man nga naa-arado.
Nadalahig man ang nakapark nga blue nga Yamaha Mio nga ginapanag-iyahan ni Alyas Rey, 39 anyos, residente sang Hofileña l Subdivision, Brgy. Mambulac, Silay City.
Luwas sa napatay, nag-angkon naman sang seryoso nga samad si Joel, nga gindala sa Teresita Lopez Jalandoni Provincial Hospital; samtang ginbulong naman sa Silay One Hospital si June.
Sa interview sang Bombo Radyo Bacolod kay Police Lt Col Edison Garcia, hepe sang Silay City Police Station, pahanumdom sini nga indi gid kalipatan kun may ginatumar nga maintenance antes magbyahe.
Dugang pa sini nga kun mahimo likawan na lamang ang magbyahe kun may ara sang ginabatyag sa corazon bangod sa tuman ka init nga tiyempo.
