Pabor ang mga driver sang traditional jeepneys nga nagabiyahe sang routa nga Alangilan-Burgos vice versa kasubong man sang Granada-Burgos vice versa sa modernization sang public utility jeepneys (PUJs).
Sa interview sang Bombo Radyo Bacolod kay Leo Veloso, driver sang tradisyunal nga jeep nga nagabiyahe sang Alangilan-Burgos, wala sang problema sa iya ang modernization program.
Suno kay Veloso, wala man sila nahadlok nga magbiyahe bisan may checkpoints bangud may yara sila sang kumpleto nga mga papeles.
Ginapahayag man sini nga willing man sila kun may yara magsulod nga modernize jeepney sa Alangilan apang sa sitwasyon sang biyahe sa karun mahimo nga mabudlayan ang operator bangud mahina ang biyahe kun sa diin mabudlayan sila sa pagbayad sang renta.
Bukas man ang mga ini nga magdrive sa modernize jeepney kun may yara nga magabiyahe sa Alangilan.
Sa karun ang mga drivers ang haluson nalang makapauli sang P300 sa kada biyahe.
Suno diri, sa ila biyahe maswerte na lamang kun sila ang mahimo nga makadulhog kag makataklad sang makaduha ka beses sa kada adlaw.
Suno pa kay Veloso, mas maayo man kun mapuno sang pasahero halin sa Alangilan ang ginabiyahe nga jeep bangud makabawi-bawi man sila.
Duha man ang pilian sang mga ini sa pagbiyahe nga ginalakipan sang porsyentuhanay kag boundery.
Sa karun P30 sa regular nga pasahero ang plete samtang P27 naman sa estudyante, senior citizen kag persons with disability (PWD).
Suno pa diri, sang una may yara sang 18 ka units ang jeep nga nagabiyahe para sa Alangilan-Burgos apang sa karun 12 nalang bangud ang iban ang mas ginpili nga indi nalang magparenew sang prangkisa bangud ginalauman na nga madula ang traditional jeepneys kag islan sang modernized jeepneys.
Magapadayon ang mga ini sa pagbiyahe samtang wala pa nag-expire ang ila mga papeles kag bukas man sila nga magbiyahe sa modernized jeepney kun may yara sang nagabiyahe sa Alangilan-Burgos.
