Handa nga magbulig sa pamilya sang napatay nga senior citizen ang driver sang tricycle nga nakabunggo sa Bangga Tomaro, Brgy. Sum-ag, Bacolod City.
Madumduman nga ginbawian gid sang kabuhi ang nabungguan nga si Terisita Vidol, 69 anyos sang nabungguan ini sang isa ka tricyce kahapon.
Sa interview sang Bombo Radyo Bacolod kay Antonio Salazar, driver sang tricycle, ginpahayag sini nga naluoy gid ini sa biktima nga si Terisita Vidol.
Suno kay Salazar, aksidente gid lamang ang natabo kag hinay man ang iya padalagan.
Suno diri, padulong siya sa SP Village sa Barangay Pahanocoy, sang ang biktima ang hinali lang nagtabok gani naalang-alang ini apisar nakahingagaw preno, nalab-ot gihapon ang biktima.
Dugang pa, wala sa impluwensya sang makahulubog nga ilimon si Salazar, kag indi niya tuyo nga matabo ini.
Sa karon, nakahunong si Salazar sa Bacolod Police Station 9 samtang ginpasalig sini nga handa gid siya magbulig sa pamilya sang biktima sa bisan ano nga paagi bilang pag-angkon sang iya responsibilidad.
