Ginhatagan sang dugang nga extension ang mga drivers kag operators sang traditional jeepneys agud makapadayon sa pagbiyahe apisar nga subong nga adlaw, Nobyembre 22, matapos na kuntani ang duha ka semana nga moratorium sa dakpanay nga ginhatag sang Land Transportation Office (LTO) Region 6 nga wala sang prangkisa.
Sang Sabado, nagpatigayon sang paghinun-anon si Bacolod City Mayor Alfredo Benitez kaupod ang mga opisyales sang LTO kag Land Transportation Franchising and Regulatory Board (LTFRB) Western Visayas kag gindiskusyunan ang proposal sang mga drivers sang traditional PUJs sa tunga sang implementasyon sang jeepney modernization program.
Sa nasambit nga paghinun-anon, nahisugtan nga ang moratorium ang magapadayon sa ginkasugtan sang LTFRB kag LTO agud makahatag sang ligwa nga transfer plan, mapreparahan sang insakto kag makumpleto ang tanan nga detalye sa pag-address sang mga concerns sang traditional kag modernized jeepneys para sa mas masulhay nga transition.
Ginhatagan man sang dugang nga extension ang mga drivers sang traditional jeepneys sa pagbyahe apang wala pa nahibaluan kun tubtob san-o.
Suno kay Maghari, ginatun-an pa sang alkalde ang nakita nga solusyon sa mga concerns kasubong man ang mga position paper nga ginpasa sa iya, ginrefer na ini sa LTFRB kag sa karun nagahulat nalang sang kumpirmasyon.
Subong nga adlaw natalana nga magpatigayon sang meeting si Benitez kaupod ang LTFRB kag LTO natuhoy sa mga issues kag concerns may kaangtanan sa modernization program.
