Aminado ang tricycle driver nga dako ang epekto sa iya nga income sang ginapaabot nga bigtime oil price hike sa Martes.
Sa interview sang Bombo Radyo Bacolod kay Kenno Dela Cruz, sa nakaandan P100 ang iya nga ginatughong para sa bilog nga adlaw nga byahe kag siya ang makapauli sang P300 ukon P500 kun maayo ang income.
Apang sa dako nga pagsaka sang presyo sang gatong, mahimo nga magdangat na sa P200 ang itughong sini sa kada adlaw.
Wala naman ang mga ini sang mahimo kundi ang mag-agwanta.
Suno diri, indi man nila pwede nga piliton ang mga pasahero nga dugangan ang plete.
Gani sila ang magahulat na lamang kun magapatuman sang fare hike, kag samtang wala pa, ibudget na lamang nila ang kita sa kada adlaw.
Samtang nagdesisyon naman ang isa ka kompanya nga tingubon na lamang ang deliveries sang ila produkto sa isa ka byahe agud makakinot.
Ini bangod sa ginalauman nga dako nga pagtaas sa presyo sang gatong.
Sa interview sang Bombo Radyo Bacolod kay Arson Ramos, sa masami P2,500 ang iya nga ginatughong, gani aminado ini nga batyagon gid sang ila nga kompanya ang dako nga pagtaas sa presyo sang diesel.
Antes paman, nagdesisyon na ang ila management nga tingubon na lamang sa isa ka byahe ang mga deliveries agud indi na magbalik-balik kag mag-usik sang gatong.
Aminado man si Ramos nga mangin makapoy ang iya trabaho, bangod siya ang nagadeliver tubtob pa sa Cadiz City kag Himamaylan City.
