Ginpahayag sang hepe sang Escalante City Police Station nga ginakabig nga kaangay kay Robinhood ang Drug Group Leader nga napatay matapos magbato sa otoridad matapos serbihan sang warrant of arrest sa Sitio Napulangan 2, Brgy Jonob-jonob, Escalante City kahapon.
Nahibaluan nga ang napatay ang ginalakipan ni Joseph Moso Bindoy nga amo ang subject sa pagserbe sang warrant of arrest; kasubong man sanday Piolo Morning Regodos, residente sang Brgy Malasibog kag Roy Bagayo Manija Jr., residente sang Brgy Jonob-Jonob, Escalante City.
May-isa naman nga nasamaran kag gindala sa ospital, kag karun yara na sa hospital arrest.
Sa interview sang Bombo Radyo Bacolod kay Police Lt Col Florendo, hepe sang Escalante City Police Station, sila ang nakaagkon sang kabudlayan sa pagdakop kay Bindoy bangod ini ang ginaprotektahan sang pumuluyo.
Gani sila ang nagpatigayon pa sang simulation activity sa pagahimuon nga operasyon.
Si Bindoy ang ginapaanggid kay Robinhood bangod ini ang nagapanghatag sang kwarta, kag sang Disyembre, ini ang nagpanagtag pa sang lechon sa mga pamalay.
Ini ang mahapos man palapitan sang mga pumuluyo.
Samtang strategic man ang ila nga lugar bangod taklaron, kag makita ang sin-o man nga nagapadulong.
Ang lugar ang ginapahayag man nga kota sang New People’s Army kag si Bindoy ang nagahatag man sa mga ini para sa proteksyon.
Suno kay Florendo, nabudlayan sila sa paglagas kay Bindoy bangod ini ang nagpasaylo saylo sang balay, tubtob nga nacorner nila sa ika-anom na nga balay kun sa diin ini ang nagbato kapin alas-2:00 kahapon sang hapon.
