Handa na ang City Health Office kag COVID Vaccination Council sang ciudad sang Bacolod sa patigayunon nga dry run para sa COVID vaccination ala 1:30 subong nga adlaw sa Barangay Villamonte gymnasium bilang preparasyon sa pag-abot sang bakuna.
Sa interview sang Bombo Radyo kay Dr. Edwin Miraflor, officer-in-charge sang City Health Office, ginpahayag sini 50 ka mga persona ang ila ginalauman kag tinguhaan nga mangin participant sa dry run vaccination.
Ini ang mga barangay workers kag residente man sang Barangay Villamonte.
Suno kay Miraflor, preparado kag handa na ang ila nga team.
Patigayunon ang nasambit nga dry run ini agud mahibaluan na sang mga pumuluyo kun ano ang pagahimuon kun mangin available na ang COVID vaccines kag magsugod na ang vaccination program kag indi na sila makulbaan.
Tinutuyo man sini nga makapreparar ang ciudad in advance sang logistic support, matumod kun ano ang mga kakulangan, mga dapat iimprove kag mga dapat pabakuron.
Ang vaccination simulation ang pagapamunuan sang City Health Office kaupod ang Maternal, Neonatal and Child Health and Nutrition Division chief, nga magasupervise sa CHO personnel.
Ini ang iga-assist sang EPI Medical kag Nurse Coordinators, HEMS, Health Education and Promotion Officer, Barangay Health Workers kag Barangay Health Emergency Response Team.
Magapakigbahin man ang City Disaster Risk Reduction Management Office (CDRRMO) sa nasambit nga aktibidad.
