Patay ang duha ka driver sang motorsiklo samtang kritikal naman ang isa ka backrider matapos magbunggu-anay sa Granada-Alangilan Road, Hacienda Carmen, Barangay Granada, Bacolod City alas-7:15 kagab-i.
Sa interview sang Bombo Radyo Bacolod kay Bacolod Traffic Enforcement Unit Head Police Lt Col. Ramil Sarona, ang mga biktima ang ginkilala nga si Helbert Lasquite, 28 anyos, single, residente sang Prk A, Bantug, Brgy Alangilan nga sakay sang pula nga Rusi nga motorsiklo, kag ang angkasanay nga sakay sa itom nga Rusi nga wala pa nahingadlaw, kag lunsay residente sang Himamaylan City apang nagatrabaho sa manokan sa Brgy Granada.
Sa imbestigasyon, ang Rusi black nga nagabyahe Alangilan padulong sa Granada ang nagcounter flow sa dalan sang Rusi red nga nagabyahe naman Granada padulong sa Alangilan.
Ginalantaw ni Sarona nga madasig ang dalagan sang mga motorsiklo kun sa diin nagkalabungkag ang motorsiklo kag naglabog ang mga biktima.
Ang mga biktima ang gindala pa sa regional hospital apang ginbawian sang kabuhi ang duha ka driver samtang ginahulat pa nila ang medical bulletin sang backrider nga patal man ang samad.
Suno diri, ang tatlo ang lunsay nakaangkon sang head kag body injuries ilabi na nga sila ang lunsay wala nakasuksok sang helmet.
Sa karun ginatumod pa kun ano ang rasun kun ngaa naga-counter flow ang Rusi black.
Wala paman ma-establishar kun naka-inom ang mga biktima.
