Patay ang duha ka drayber sang motorsiklo matapos ang aksidente nga nagluntad sa Osmeña Avenue, Brgy. 3, Victorias City nagligad nga Pebrero 15 sang gab-i.
Una diri, gin-usoy sang una nga drayber nga napatay nga ginkilala kay Jeffrey Nieso, 37-anyos sang Brgy. 20, Victorias, ang norte pa-sur nga direksyon sang nabungguan sini ang paliko naman nga si Pastor Malasibas, 30, sang Brgy. Pasil, EB Magalona.
Naga-angkas naman kay Malasibas si Stephen Sotomil, 30, sang Brgy. 3, Victorias City.
Suno kay Police Master Sergeant Alfredo Javellana, gilayon nga napatay si Nieso matapos ang aksidente pasado alas-11:00 sang gab-i, apang gindala pa man ini sa Ikaayong Lawas Medical Foundation Clinic upod man si Malasibas kag Sotomil apang ginsaylo ang duha sa Corazon Locsin Montelibano Memorial Regional Hospital.
Apang pasado alas-7:00 kahapon sang aga sang nagtaliwan naman sa regional hospital si Malasibas samtang yara na sa estable nga kondisyon si Sotomil.
