Pilason ang duha ka mga persona matapos madakpan kag ginpulihan sang mga pumuluyo kasunod sang pagpanghold-up sa nagabaligya sang second hand nga cellphone sa Goldenfield Commercial Complex sa Barangay Singcang-Airport, Bacolod City kahapon.
Ang biktima ang ginkilala kay Hiro Charita, samtang ang mga suspects ang ginkilala nga sanday Stephen John Villamil kag Lenon Villarin.
Sa interview sang Bombo Radyo Bacolod kay Hiro Charita, biktima sang pagpanghold-up, gintayaan ini sang isa sa mga suspects sang kutsilyo sa li-og gani nagpangayo ini sang bulig sa mga pumuluyo.
Suno kay Charita, gilayon man siya nga ginbuligan sang mga residente tubtob nga nacorner ang mga suspek kag nadakpan kun sa diin ang duha ang nakaagom sang samad bangud nakastiguhan sang mga residente.
Nagtuyo pa kuntani magpalagyo ang isa sa mga suspetsado sakay sa motorsiklo apang nacorner man sang mga pumuluyo.
Desido man ini nga magpasaka sang kaso batok sa mga suspetsado.
“Makadelehinsya kuntani,” amo ang nangin rason sang isa ka suspetsado sa pagpanghold-up.
Sa interview sang Bombo Radyo Bacolod kay Stephen John Villamil, nakaagi na ini priso sa kaso nga illegal gambling.
Suno kay Villamil ginkawat sini ang cellphone sa tinutuyo nga makadelinsya kuntani.
Ginpahayag sang suspect nga napilitan lamang siya nga magpangawat.
Wala naman ini nagkomento tuhoy sa nakuha sa iya nga suspected shabu.
Atubangon man sini ang ipasaka nga kaso batok sa iya.
