Ginklaro sang alkalde sa banwa sang Hinobaan nga wala sang kaangtanan sa baha ang pagkakuryente kag pagkapatay sang duha ka persona sa Purok Daisy, Barangay Talacagay sa banwa sang Hinobaan, Negros Occidental.
Ang mga biktima amo sanday Kenny Villanueva, kabulig sa balay kag ang kaingod nga si Florante Janoy.
Sa interview sang Bombo Radyo Bacolod kay Hinobaan Mayor Daph Anthony Reliquias, nagapanghalay si Villanueva sang matabo ang insidente bangod ang halayan ang naga-angot sa open wire.
Ini ang ginbuligan ni Janoy, apang sila ang parehas nga nakuryente.
Pag-abot sang rescue, unconscious na ang duha kag lunsay ginbawian sang kabuhi.
Samtang sa karun nagdangat na sa 342 ka indibidwal ukon 85 ka pamilya ang nag-evacuate sa ila nga banwa as of alas-9:00 kaina sang aga.
Suno kay Reliquias, tayuyon ang madamol nga pag-ulan kagab-i nga gin-updan pa sang mabaskog nga hangin.
Pahayag sang alkalde nga indi pa nila papulion ang mga yara sa evacuation centers tubtob wala pa sang abiso gikan sa Disaster Risk Reduction and Management (DRRM) officer.
Pasalig sini nga sila ang may-ara sang standby fund para sa kalamidad samtang nagcontact naman sa iya ang Department of Social Welfare and Development, bangod sila ang may prepositioned goods para sa mga apektado.
