Mahimo nga sa masunod nga bulan, makahatag na sang 5 percent discount ang pila ka mga botika sa mga miyembro sang Bacolod City Comprehensive Health Program (BacCHP) program.
Sa interview sang Bombo Radyo Bacolod kay BacCHP focal person Engr. Mae Cuaycong, sila ang BacCHP desk agud mapadasig ang registration sang mga luyag magpamiyembro sa BacCHP Program sa Ayala Malls Capitol Central kag SM City Bacolod.
Ang BacCHP ang nagabulig para sa pagbayad sa admission sang mga Bacolodnon sa pribado ukon pampubliko nga ospital sa ciudad sang Bacolod kasubong man funeral assistance.
Apang target sang Bacolod City Government nga malakip sa serbisyo ang paghatag sang discount sa mga ginaresita nga bulong.
Antes ang State of the City Address (SOCA) ni Bacolod City Mayor Alfredo ‘Albee’ Benitez, nagdangat na sa 107,425 ang mga miyembro sang BacCHP program samtang masobra 54,000 naman ang nahatagan na sang BacCHP card.
Samtang masobra 5,000 naman ang naka-avail na sang benepisyo sang BacCHP.
Matapos ang SOCA, kun sa diin ginmensyonar sang alkalde ang paglink sang mga pharmacy sa BacCHP, may duha na ka kompanya nga nagpalapit agud mag-offer sang serbisyo.
Apang indi malakip sa mahatagan sang discount sa bulong ang mga senior citizens kag persons with disability bangod sila ang may dako na nga discount, gani ini ang mangin available na lamang sa mga regular patients.
Samtang bangod may mga resident doctors sa nasambitan nga mga pharmacies, sila ang naga-offer man sang libre nga konsultasyon kada bulan.
Apisar nga masobra 107,000 pa lamang ang miyembro, mas dako naman ang makabenepisyo bangod kada BacCHP card holder ang may-ara sang tatlo ka dependent nga family members.
