Lunsay minor injuries ang mga naangkon sang mga sakay sa duha ka salakyan nga nagbungguanay sa Buri Road, Barangay Mandalagan, Bacolod City alas-9:00 ang takna kagab-i kasubong man ang sakay sang naulamid nga motorsiklo.
Nagikan sa west padulong sa east ang Toyota Revo nga may anom ka mga sakay, kalakip na ang duha ka mga minor; samtang ang Toyota Vios nga may apat ka sakay, kalakip ang duha ka minor, ang nagikan naman sa sur padulong sa norte nga dereksyon sang ang mga ini ang nagbungguanay.
Sakay sang Toyota Revo sanday Jan Therese Robleza, 37 anyos, driver; Thea Marie Robleza, 38 anyos; Dotty Garrand, 36 anyos; Venice Monic Robleza, 24 anyos kag duha ka mga menor di edad.
Samtang sakay naman sang Toyota Vios sanday Juanito Sarita II, 35 anyos, driver, residente sa Celina Homes, Barangay Estefania, Bacolod City; asawa sini nga si Cathlyn June Sarita, 36 anyos kag duha ka menor de edad nila nga mga kabataan.
Bangod sa makusog nga impact, nagdangat naman sa apat ka span sang highway ang nangin antad sang duha ka salakyan sa isa kag isa samtang naulamid man ang motorsiklo nga nagapundo lang sa higad sang dalan nga ginasakyan nanday Haji Isidro, 22 anyos, driver kag Jenelyn Bombales, 30 anyos, backrider.
Ang mga biktima ang gilayon man nga gindala sa ospital para sa pagbulong.
