Nagapabilin pa sa ospital ang duha ka mga pulis matapos magbato ang subject sang warrant of arrest nga ila ginserbe sa Purok Neptune, Brgy Singcang Airport, Bacolod City sang Huwebes sang gab-i.
Sa interview sang Bombo Radyo kay Bacolod City Police Office spokesperson Police Lt. Liberty Indiape, magaserbe kuntani ang mga miyembro sang Bacolod City Mobile Force Company sang warrant of arrest sa kaso nga murder batok kay Limuel Talaman, 34 anyos kag residente sang nasambit nga lugar apang gintiro sila sang suspetsado.
Naigo sa nawala nga kamot si Patrolman John Ray Ortega samtang napilasan naman sa tiil ang team leader nga si Police Lt. Roque Gimeno III samtang ginapacify ang suspetsado.
Padayon naman nga ginabulong sa balay-bululngan ang mga ini.
Samtang, nadis-armahan naman kag natigayon nga maaresto ang suspetsado kag nakahunong na sa Bacolod City Police Station 8.
Hatagan naman sang financial assistance sang Bacolod City Police Office kag ni Police Regional Office Police Brigadier Rolando Miranda ang mga pilason nga police sa ila nga performance sa legitimate police operations.
