Duha sa lima ka napatay nga miyembro sang New People’s Army may yara sang mataas nga position sa ila grupo.
Madumduman nga sa nagluntad nga engkwentro sa tunga sang 15th Infantry Batallion sang Philippine Army kag NPA sa banwa sang Cauayan, Negros Occidental sang Sabado, may yara sang lima ka mga napatay.
Ang duha nga napatay nga may mataas nga posisyon amo sanday Rolando Dantes Jr, alyas Mista/ Ana/ Anyo/ Arnel/ Roman/ Yo/ Jake, ginabanta naga-edad sang 39 anyos, kag squad leader sang squad 2 Sandatahang Yunit Pampropaganda (SYP) sang Southwest Front.
Si Dantes ang residente sang Sitio Lin-ab, Barangay Camalanda-an, Cauayan
Ang isa amo si Francis Vince Dingding, alyas Poy, nga amo ang deputy speaker sang SouthEast Front kag political instructor nga residente sang Don Gil Garcia Extension, Capitol Site Poblacion, Cebu City.
Samtang ang tatlo naman amo sanday, Jobert Casipong, alyas John/ Ruby, 28- anyos, kabahin sang medical team sang squad 2 SYP platoon sang Southwest Front; Gilbert Tingson, alyas Ryan/ Kolintong, ginabanta naga-edad sang 50, miyembro sang squad 2 SYP platoon sang SWF kag lunsay mga residente sang Sitio Lower Cabilucan, Barangay Camindangan, Sipalay City; Alex Chavez Languita, alyas Axel, miyembro sang Southeast Front nga residente sang GK, Barangay Kabukalan, Santa Catalina, Negros Oriental.
Sa interview sang Bombo Radyo kay Brig. Gen. Jason Jumawan, commander sang 302nd Infantry Brigade, may isa ka NPA nga napilasan nga gindala sa ospital matapos maka-agom sang pilas sa tiil kag alatrasan nga sa karun yara na sa estable nga kondisyon.
Ginkilala ini nga si alyas John Rey apang suno kay Jumawan may ginahatag man ini nga lain-lain nga pangalan.
May narekober man nga mga high powered firearms sa area kaangay sang M203, machine gun, M16, M14, improvised explosive device, rifle grenade kag iban pa.
Dugang pa ni Jumawan si Dantes, Casipong, kag Tingson, lunsay mga miyembro sang Sandatahang Yunit Pampropaganda nga amo ang nagapamatay kag nagapamahog agud mapalapad ang ila presensya.
