Ginkilala sang World Travel Index (WTI) ang Dumaguete City subong nga bulan bilang pinakahilway ukon safest nga ciudad sa Pilipinas.
Santo sa record sang WTI, may safety score nga 81.36 percent ang Dumaguete, kun sa diin nakuha ang pwesto nga number 1 sa Pilipinas kag rank number 1,097 sa bug-os nga kalibutan.
Ginsundan ini sang Davao City nga may 80.73 percent score; Bulacan nga may 76.4 percent; Balanga City, Bataan – 76.15 percent; Lucena City, Quezon – 75.24 percent; Naga City – 75.02 percent; Baguio City – 73.99 percent; Puerto Princesa; Legazpi City – 71.34 percent kag Makati City.
Samtang ang Bacolod City nagrank number 23 sa mga ciudad sa Pilipinas nga may safety score nga 57.43 percent.
Suno sa WTI website, ang kabug-osan nga safety score ginbase sa lima ka sub-category: Safety sang mga residente kag bisita kada adlaw kag gab-i, insidente sang pagpangawat; drug free kag violence-free assessments.
Suno sa Negros Oriental Police Provincial Office, ang report ang nagapakita nga sigurado nga nagabatyag sang kahilwayan ang mga pumuluyo kag turista sa Dumaguete, adlaw man ukon gab-i, bangod sa manubo nga posibilidad sang krimen kag pagpangharas.
Sang 2023, ginkilala sang international travel website nga naga-abiso sa mga global travel sa mga secure destinations ang Dumaguete bilang rank 4 sa mga safest cities sa Pilipinas.
