Nagapanawagan sang bulig sa medication ang asawa, para sa bana sini nga gin-operahan matapos makuryente sang nagaluyloy nga linya sang kuryente sang Negros Electric and Power Corporation (NEPC) sa Barangay Abuanan, Bago City.
Nagdangop sa Bombo Radyo Bacolod ang asawa nga si Anabelle Lozada agud sila ang mabuligan nga mapalab-ot sa Negros Power ang ila concern.
Suno diri, ang iya bana nga si Henson Lozada, 46 anyos ang nagadrive sang dump truck nga may karga nga crack stone ukon gravel.
Apang pagdangat sa Purok Kadena de Amor, Brgy Abuanan, Bago City sang Pebrero 10, nakabati si Henson nga may nagalinagapok sa likod sang iya nga truck.
Nakita sini nga nasab-it sa kuryente, apang wala ini nagdahom nga nagadikit nga ini ang may open wire na kag nagatapik sa kaha sang truck.
Magwa kuntani si Henson agud tekyaron ang truck apang pagkapyot pa lamang sini sa piyertahan sang salakyan, siya ang nagpilit naman bangod sa nagalatay nga kuryente.
Gindala sa Bago City Hospital ang biktima kun sa diin gin-utod ang duha sini ka kamalingking sa tiil, kag ang kamalagko kag katupad sini nga tudlo, samtang may madalom naman nga pilas sa butkon matapos nga siya ang nakaangkon sang paso sa butkon, dughan kag tiil.
Ginapakamaayo na lamang nga sa iya mga tudlo naglatay kag nag-exit ang kuryente kag indi sa corazon.
Gin-operahan si Henson, kag sila ang nakagwa sa ospital sang Pebrero 21.
Apang pagpauli, nagbaho ang butkon sang biktima bangod sa indi maayo nga paglimpyo gani ini ang ila gindala sa pribado nga espesyalista kun sa diin ginrekomendar ang liwat nga operasyon.
Ginsalo naman sang employer sini ang gasto sa surgery nga nagdangat sa P150,000.
Apang matapos sini, sila ang gin-abisohan nga magbalik kada duha ka adlaw para sa pagdressing sang pilas bangod ginakuha amat-amat ang nagmala nga dugo kag patay nga unod.
As of kahapon, sila ang naka-14 na nga pagbalik-balik para sa pagdressing kun sa diin P5,000 tubtob P8,500 ang ila ginabayad kada session.
Ginpasalamatan man ni Anabelle ang suporta sang ila punong Barangay kag sang employer nga wala gid ginpabay-an ang iya bana.
Apang ginalantaw nga masobra pa sa isa ka bulan antes matapos ang dressing session, nga tuman ka dako nga galastuhan.
Aminado si Anabelle nga aksidente ang natabo, apang nagahingyo ini sa Negros Power nga sila ang mabuligan.
Samtang Gilayon nga nagpasalig sang pagbulig ang Negros Electric and Power Corporation (NEPC) sa dump truck driver nga nakuryente sa Purok Kadena de Amor, Barangay Abuanan, Bago City.
Nahibaluan nga natabo ang insidente sang Pebrero 10 matapos gina-alegar masagaid sang truck ang nagaluyloy nga linya sang kuryente.
Ang biktima nga si Henson Lozada, 46 anyos ang nakuryente sang magagwa na kuntani sa truck agud tsekyaron ang sitwasyon, bangod nagtanday na ang live wire sa kaha sang salakyan.
Ginpasalamatan ni Negros Power Spokesperson Jonathan Cabrera nga ginpalab-ot sa ila ang concern.
Ini matapos magdangop sa Bombo Radyo Bacolod kag gintalakay sa Ipa-Bombo Mo segment ang hingyo sang asawa nga si Anabelle Lozada nga mabuligan ang iya bana sa medical treatment.
Suno kay Cabrera, ginpatsekyar pa sini ang report, agud matumod kun ang Negros Power ang may-ara gid man sang salabton ilabi na nga may blotter report man sa kapulisan tuhoy sa insidente.
Bilang humanitarian consideration, ginpasalig man sini nga buligan nila ang pagpabulong ni Henson.
Ginkumpirmar ni Cabrera nga gincontact na sini ang asawa, kag nakasugtan nga sila ang magakitaay subong nga hapon.
