Nalubong na ang isa sa tatlo nga napatay matapos gin-arado sang salakyan nga ginamaneho sang Indian National sa Barangay Alangilan sang Biyernes Santo.
Gindul-ong na sa ulihi nga palahuwayan si Dyna Plohinog sa banwa sang Isabela samtang si Carl Agam naman nga nobyo sini ang wala pa makahibalo nga nagtaliwan na si Dyna kag wala pa man ini nakagwa sa ospital.
Sa interview sang Bombo Radyo Bacolod kay Analene Agam, iloy ni Carl, wala pa nakahibalo ang anak sini sa natabo kay Dyna.
Suno diri, natapos na ang pag-opera sa bali sa buli sang iya bata kag may isa pa ka operasyon nga gintalana para sa tiil sini.
Dugang pa sini may yara na sila sang ginpadala nga sulat ang korte sa ila sa Barangay Alangilan para sa hearing sang ila nga kaso nga ginpasaka batok sa Indian national.
Suno kay Analene sa Mayo 5 ang gintalana nga schedule sang hearing.
Itinguhaan man sang mga ini nga makuha ang hustisya sa natabo sa ila.
Ginpahayag man sini nga masobra na sa P100 mil ang hospital bill nila apang ibuhin man diri ang BACHP, Philhealth kag nagpahayag man nga magabulig man si Bacolod City Mayor Alfredo Benitez.
Nagapamangkot man si Carl angot kay Dyna apang ginahambalan niya lang ini nga unahon ang iya nga kaugalingon antes ang iban.
