Ginatanyag ni Bacolod City Mayor Alfredo “Albee” Benitez ang mga electric jeepneys para sa mga operators sang traditional jeepneys nga mahatagan pa sang provisional authority sa pagbyahe sumugod sa Mayo 1.
Sa press conference sang alkalde, ginpahayag sini nga sa ginhimo nga pagtuon, natumod nga ang ciudad sang Bacolod ang magakinahanglan sang 2,500 ka mga public transportation agud macater ang tanan nga riding public.
Apang sa karun, 500 tubtob 600 pa lamang ka mga units sang modernized jeepneys ang yara sa Bacolod.
Gani ang mga traditional jeepney operators nga nagsulod sa consolidation ang magapadayun pa sa pagbyahe agud nga may masakyan ang publiko.
Nakahinun-anon naman sini ang mga operators, nga nagsugot man sa paghatag sang provisional authority bangod aminado ini nga mabudlay ang pagkuha sang modernized jeepney unit.
Suno sa alkalde sa modenized jeepneys, dako ang gasto sa kada bulan bangod may-ara sang ginabayaran nga amortization.
Ini ang nagaserbe nga dilemma para sa mga operators nga sadto wala man sang kaangay nga ginabayaran.
Apang paathag sang alkalde nga ang PUV Modernization Program ang gindihon bilang pamaagi sa pag-address sa nagalala nga climate change.
Panindugan ni Benitez nga kun indi pa maghulag, mas magalala pa ang sitwasyon sang kalibutan sa palaabuton, gani sa karun ginatinguhan nga mangin environment friendly na ang means of transportation.
Apang kun luyag nga maka-angkon sang mas dako nga ginansya, ginatanyag sang alkalde ang electric jeepneys.
Suno diri sa e-jeep, manubo ang operating cost gani mas dako ang ligwa agud mabayaran ang amortization, kag may mabilin pa nga income para sa mga drivers kag operators.
