Ginpahanumdom sang alkalde sa ciudad sang Bacolod nga mangatubang sa sanction ang mga madakpan nga nagalagaw sa work from home setup sang Bacolod City Government kada Biyernes.
Nahibaluan nga ginsuguran ang implementasyon sang flexible work arrangement humalin sang Lunes, Abril 6, kun sa diin ginmando sa tanan nga non-essential nga opisina kag departamento sa Bacolod City Government Center ang onsite working set-up Lunes tubtob Huwebes alas-8:00 sang aga tubtob alas-5:00 sang hapon.
Ini ang ginpanubo sa nauna nga implementasyon nga alas-8:00 sang aga tubtob alas-7:00 sang gab-i, bangod sa masami tubtob alas-5:00 lamang nagatransaksyon ang mga pumuluyo, kag wala naman sang ginaproseso sa sobra nga oras.
Samtang ang Biyernes ang ginhimo naman nga work from home set-up.
Apang magapabilin ang adlaw-adlaw nga trabaho sa mga opisina kag departamento nga nagahatag sang essential services kaangay sang nagahatag frontline services, health emergency, response unit, kag iban pa.
Ang pagpatuman sang flexible work arrangement ang may tinutuyo nga mapanubo ang konsumo sa kuryente sang Bacolod City Government, samtang may isa man ka adlaw nga indi kinahanglan magplete sang mga empleyado.
Pahanumdom naman ni Mayor Greg nga sa work from home, imonitor man ang mga outputs sang mga empleyado basi sa mga computer-based nga mga trabaho.
Suno diri, ang mga madakpan nga yara sa gwa kag nagalagaw sa tion sang work from home nga schedule ang magapangatubang sang sanctions.
