Naghusayay na ang empleyado sang business process outsourcing company kag tricycle driver nga ginreklamo nga nagbiglang liko sa pasahero sa lain nga dalan nga nagresulta sa paglumpat sang pasahero sa tricycle sang Agusto 31.
Natabo ang insidente sa Greenplain Subdivision, Barangay Singcang Airport kun sa diin nagikan ang babayi sa ginaubrahan nga BPO kag nagsakay sa tricycle agud magpauli sa Purok San Roque, Barangay Tangub, Bacolod City sang Agusto 31 sang gab-i.
Samtang nagabyahe, hinali lang ginliko sang driver ang tricycle padulong sa lain nga lugar.
Bangud sini, nagsinggitan ang babayi nga mapundo na ang driver bangud ini ang magapanaog apang wala nagpundo ang tricycle gani napilitan ang babayi nga maglumpat.
Suno kay Police Major Joery Puerto, station commander sang Bacolod Police Station 8, napilasan ang babayi sa tuhod kag siko.
Nagpabulig naman ang tricycle driver sa isa man ka pulis gani naghusayay sila nga duha sa Lupon ng Barangay.
Suno sa driver sang tricycle, may checkpoint sa labayan nila nga dalan gani nagdivert ini sa pihak.
Sa pagverify ni Puerto sa ila nga team, natukiban nga may checkpoint operation ang Police Station 8 halin alas-9:00 sa gab-i- tubtub alas-10:00 sa gab-i apang nahamtang ini sa Bangga CEGASCO nga malayo sa labayan sang tricycle.
Suno sa driver, may yara ini sang lisensya apang wala sang rehistro ang iya nga motorsiklo.
Nagkasugot ang duha nga indi na magpasaka sang kaso ang babayi apang sabton sang driver ang pagpabulong sang iya mga pilas.
