Arestado ang isa ka empleyado sang Provincial Capitol sa gin-patigayon nga buybust operation sang Police Station 7 sa syudad sang Bacolod.
Sa impormasyon nga nakuha sang Bombo Radyo Bacolod, sadtong adlaw sang Sabado, Mayo 4, sang nadakpan sang mga kapulisan ang suspetsado nga ginkilala kay Francisco Nuñal, 56 anyos, taga banwa sang Pulupandan, kag temporaryo nga naga-puyo sa Barangay 2 syudad sang Bacolod sa diin gin-patigayon ang operasyon.
Si Nuñal ang isa ka clerk sang Treasurer’s Office sang kapitolyo probinsyal sa madugay na nga tion.
Sa interview naman sa OIC head sang nasambit nga talatapan nga si Ruby Barbosa, ginpahayag sini nga humalin Abril 30 sang wala na nagasulod sa opisina si Nuñal.
Gin-ako man sini nga madugay na nahibaluan sang iban nga mga empleyado nga naga-usar sang droga ang suspetsado.
Kun madumduman, may yara na sang 2 ka empleyado ang probinsya nga nag-positibo sa iligal nga droga.
Samtang yara nakahunong sa kustodiya sang Bacolod City Police Station 7 ang suspetsado kag naga-pangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002.
