Nagpangayo sang gamay pa nga pasensya ang tiglikom sa Department of Energy para sa mga pumuluyo nga nadulaan sang power supply sa probinsya sang Cebu.
Sa interview sang Bombo Radyo Bacolod kay Energy Secretary Sharon Garin, 13 ka mga banwa ang naka-eksperyensya sang power outages kag yara sa 60 mil ka indibidwal ang apektado matapos ang pagtay-og sang 6.9 magnitude nga linog.
Pahanumdom sini nga ang power industry ang ginabug-usan sang generation, transmission and distribution, kag kada sektor ang nagpatigayon sang pagtsekyar sang ila nga mga pasilidad kag equipments.
Ini bilang pagpangaman bangod inkaso may-ara sang nag-angkon sang damages, mahimo nga maapektuhan ang tanan.
Suno kay Garin, nahimo man nga makonekta gilayon ang linya gikan sa Generation kag sa Transmission sa una pa lamang nga adlaw.
Sa karun, naplastar naman ang backbone sang power distributors kag kinahanglan na lamang nga makonekta sa mga pamalay.
Pasalig ni Garin nga amat-amat naman nga i-energize ang linya sa masunod nga mga inadlaw.
Una naman nga naggamit sang generator agud mahatagan sang power supply ang mga ospital.
Suno kay Garin, derektiba ni President Ferdinand “Bongbong” Marcos nga unahon sa ang pagpabalik sang kuryente kag tubig.
