Ginpahayag sang isa ka residente sang Barangay Taculing nga madamo man sa gihapon ang nagapadulong sa sa esplanade malapit sa Bacolod City Government Center apisar nga madamol kag mataas nga tigbaw ang nagasugata sa tagsa ka indibidwal nga nagakadto didto.
Sa interview sang Bombo Radyo Bacolod kay Richee Acostan, madamo man sang nagajogging sa lugar kun aga kag madamo man ang nagalagaw diri.
Apang wala man sini ginlipod nga may mga barandilya na nga nagkaladula kag ang mga suga ang wala nagasiga.
Suno diri, kuntani, makita man sang syudad ang nagkalahukas nga railings kag mapakay-o bangud delikado sa mga bata nga magpadulong sa esplanade nga mahimo nga mahulog sa suba.
Samtang, personal man nga nakita sang Bombo News Team ang sitwasyon matapos nga nagpadulong sa esplanade.
Magluwas nga madamol kag matag-as nga tigbaw kag nagkaladula nga barandilya kasubong man sang wala nagasiga nga suga, ginahimo man nga halayan sang linabhan ang railings sa esplanade.
Santo man sa impormasyon nga nakuha sang Bombo Radyo Bacolod, ang esplanade project ang wala pa naturn-over sa syudad sang Bacolod.
Ginpahayag man sang Public Order and Safety Office (POSO) nga butangan man mabantay ang esplanade nagikan sa ila opisina apisar nga wala pa sang mando nga nabaton nagikan sa city government.
