Madali nalang iturn-over sa City Government sang Bacolod ang ginapatukod nga evacuation center sa Brgy. Vista Alegre.
Sa interview sang Bombo Radyo kay Bacolod City Lone District Congressman Greg Gasataya, nagalaom ini nga maturn-over na masunod nga semana sa ciudad ang evacuation center.
Suno kay Gasataya, ang 3,000 square meters nga duta ang ginapanag-iyahan sang ciudad samtang ang pondo naman sa pagpatindog ang naghalin sa Department of Public Works and Highways (DPWH).
Suno sa iya, ginatos katawo ang sarang nga maakomodar sang duha ka panalgan nga evacuation center kag may yara ini sang kapilya sa idalom kag infirmary nga maka-akomodar sang isa ka gatos ka tawo.
Gindugang man sang kongresista nga may yara sang separado nga banyo para sa mga babayi kag lalaki, may laundry system kag konektado man ini sa linya sang BACIWA kag CENECO.
Magluwas diri, may yara man sang kaugalingon nga power generating system kag water system ang in kaso sang mga kalamidad.
Aminado si Gasataya nga layo sa ciudad ang lokasyon sang evacuation center apang suno sa iya, wala naman sang bakante nga 3000 square meters nga duta nga yara sang sentro sang Bacolod City.
Ang P36 million nga balor sang evacuation center ang ginalauman nga maturn over sa ciudad sa Biyernes dasun semana.
