Yara sa Metro Inn sa 6th Lacson Street si retired Police Major Lito Pirote sang gin-abduct ini sang ginabanta lima ka mga lalaki, Biyernes Santo sang hapon.
(Update) Padayon pa ang imbestigasyon sang Bacolod City Police Office may kaangtanan sa pag-abduct sang armado nga mga lalaki sa retired police officer nga gin-angot ni Presidente Rodrigo Duterte sa illegal drug trade.
Suno sa Bacolod City Police Station 2, yara sa Metro Inn sa 6th Lacson Street si retired Police Major Lito Pirote sang gin-abduct ini sang ginabanta lima ka mga lalaki, Biyernes Santo sang hapon.
Nagatambong si Pirote sa family reunion sang hinali lang nga nag-abot ang mga suspetsado nga nagasuksok sang bonnet, bullet proof vest kag armado sang mataas nga kalibre sang armas.
Gindis-armahan sang mga ini ang gwardiya kag gintayaan sang armas ang tanan nga staff sang hotel sa ground floor.
Nagpanginpadlos pa kuntani si Pirote apang ginhampak ini sang armas sa kamot kag ginbakol sang tubo sa batiis.
Gilayon ini nga ginpasakay sang mga suspetsado sa puti nga van nga nagpadulong sa Lacson Street.
Samtang, nag-paiway anay nga maghatag sang pahayag ang pamilya ni Pirote may kaangtanan sa insidente.
Sa pagpangusisa sang Bombo Radyo Bacolod, tumandok sang Barangay Villamonte si Pirote kag bag-o lang ini nakapauli nagikan sa Metro Manila agud kuntani nga magtambong sa ila nga family reunion.
Huwebes Santo nag-check in sa hotel ang anay pulis kag diri na ini nagtinir tubtub sang Biyernes.
Sa Pirote ang nalakip sa apat ka mga aktibo nga pulis nga gin-ulamid ni Duterte sa illegal drug trade sang ginpagwa sini ang drug matrix sadtong October 2018.
Kaupod sini sa listahan sanday Police Col. Leonardo Suan, Police Lt. Conrado Caragdag Jr. kag Police Executive Master Sergeant Alejandro Liwanag.
Si Pirote ang assigned sadto sa Police Regional Office Central Luzon apang sang naggwa ang drug matrix, gilayon sila nga ginsaylo sa Police Holding Administrative Unit (PHAU) sa Camp Crame.
Kalakip man sa drug matrix sanday Philippine Drug Enforcement Agency (PDEA) deputy chief for administration retired general Ismael Fajardo, dismissed Police Col. Eduardo Acierto kag Jimmy Guban, agent sang Bureau of Customs (BOC) Intelligence and Investigation Service.
Bulan sang Enero subong nga tuig, nalakip man si Pirote sa mga ginpasakaan sang PDEA sang kaso kriminal kag administratibo may kaangtanan sa shabu shipment nga nagabalor sang P11 billion sadtong August 2018.
Suno sa Police Regional Office 6, si Pirote ang assigned sa Anti-Illegal Drug Special Operation Task Group antes siya nagretiro.
