Wala na nagapauli ang stepfather ni Pearl Joy Galve humalin sang tinalikdan nga adlaw.
Sa interview sang Bombo Radyo Bacolod subong nga Hwebes sang aga kay Jennifer Galve, iloy ni Pearl Joy, lima na ka adlaw nga wala nakapauli si Rene John Nasis nga tumandok man sang Brgy. Sum-ag.
Si Nasis ang naglakat sang Domingo kag wala na nagbalik sa ginaistaran nila ni Jennifer sa Purok Pag-asa, Brgy. Sum-ag.
Suno kay Jennifer, may gin-awayan sila ni Nasis bangud nagapangimon ini sa iya.
Indi pa makahambal si Jennifer kun si Rene John ang posible nga nagpatay kay Pearl Joy.
Si Pearl Joy ang 15-anyos nga dalagita nga namissing sa Barangay Sum-ag, Bacolod City sang July 29 kag nakita nga isa na ka bangkay sa katubuhan sa Hacienda San Roque, Brgy. Cubay, La Carlota City, kahapon sang aga, August 14.
Siya ang Grade 10 student sa Sum-ag National High School. Nakasulod pa ini sa klase sang July 29 sang aga apang wala na ini nakapauli. Nabilin sa ila nga classroom ang iya nga bag.
