Nagapanugyan ang executive assistant to the mayor sa ciudad sang Bacolod sa mga pumuluyo nga nagatinir sa flood-prone areas nga mag-ulualigmat kag mamati sa mga advisories sang PAG-ASA sa tion nga may bagyo kag mga kalamidad.
Suno kay Executive Assistant to the Mayor Aaron Bais, ang mga residente nga nagapuyo sa idalum sang taytay kag higad sang suba, creek kag mga baybay ang mas prone sa pagbaha kag mga insidente gani sila ang dapat nga magbantay kag mag-ulualigmat kun may kalamidad.
Suno kay Bais, ang mga flood prone areas sa Bacolod ang ginalakipan sang mga pamalay nga nahamtang sa Mandalagan Creek, Purok Carvic, Banago River, Pahanocoy Creek, kag Mambuloc River sa Barangay 10.
Samtang, ginpahayag man sini nga wala nagpagwa sang deklarasyon sang suspension sang klase si Mayor Alfredo Benitez kahapon, nangin matawhay man ang klase sa ciudad kag nangin tuman ka nubo ang precipitation.
Suno diri, ang deklarasyon sang suspension sang klase ang magagikan sa National Disaster Risk Reduction and Management Council (NDRRMC) kun may makita sila nga pagpamahog.
Suno diri, kun ang NDRRMC na ang magdeklarar automatic kag indi na kinahanglan nga magdeklarar ang mga LGU.
Ikaduha suno sa iya amu ang Department of Education kun sa diin kun magdeclare na ang DepEd nga wala sang klase, wala naman sang may mahimo ang mga LGU.
Apang suno kay Bais, apisar nga wala sang deklarasyon ang NDRRMC kag DepEd, kun may nakit-an ang chief executive nga pagpamahog, may inisyatibo ini nga magdeklarar.
Sa bahin naman sang executive assistant, nagapati ini nga wala man sang pagpamahog kahapon sa ciudad.
