Gin-athag sang bise-alkalde sang Bacolod City nga nagasunod lang ang ciudad sa protocol sang Department of Health (DOH) nga edad kag gender lang sang mga nagpositibo sa coronavirus disease 2019 (COVID-19) ang impormasyon nga sarang mapagwa sa publiko agud maprotektahan ang pasyente kag malikawan ang diskriminasyon.
Sa interview sang Bombo Radyo kay Vice Mayor El Cid Familiaran, ginpahayag sini nga mando sang DOH nga indi pag-idisclose ang personal information sang persona nga nagpositibo sa COVID-19 agud malikawan ang diskriminasyon kag pagbash sang mga tawo.
Suno sa iya, may yara sang nagalapta nga litrato sa social media sang gina-alegar 56 anyos nga lalaki nga nagpositibo sa COVID-19 sa Bacolod kag suno sa iya, indi pa gani kompirmado kun matuod-tuod ini, grabe na ang pagkondenar sang mga tawo.
Bangud diri, suno kay bise-alkalde, kun may yara sang iban nga makabatyag sang sintomas, mahuya nalang ini nga magkadto sa ospital agud malikawan ang diskriminasyon gani dako ang posibilidad nga indi ini mag-ayo kag maglapta pa ang virus.
Gani nagahingyo si Familiaran sa publiko nga untaton ang pagpalapta sang indi matuod-tuod nga impormasyon kag ang pagkondenar sa mga infected sang virus bangud wala man nila ini gin-gusto.
Suno kay Familiaran, may mga stratehiya nga ginakonsiderar ang local government kag kalakip na diri ang pag-ubra sang medical mission sa Bay Center agud kun may yara sang nagamasakit, didto na lang magkadto kag indi na sa mga ospital.
Suno sa iya, ang prayoridad sang mga ospital sa karun ang mga persona nga nagasuprer sang hilanat kag flu-like symptoms.
Gindugang man sini nga suhestiyon man nga kun may yara sang nagapakita sang nagatrangkaso sa kada barangay, ibutang ini sa mga evacuation center ukon isa ka kwarto sa malapit nga eskwelahan agud malikawan ang paglapta sini sa iban pa nga mga pumuluyo sang barangay.
