Ginpahayag sang president sang Federation of Irrigators Association of Central Negros-Bago River Irrigation System (FIACN-BRIS) nga may yara na sila sang ginahimo na nga preparasyon sa possible nga pagluntad sang Super El Niño sa bulan sang Oktubre.
Sa interview kay President Pedro Limpangog, nagpaidalom sa nagkalain-lain nga training ang miyembro sang Federasyon kag isa na diri ang nagakaigo nga water delivery kag distribution.
Sa nasambit nga Sistema, ginatalana kung san-o makabaton sang tubig depende sa water level sa dam.
Suno kay Limpangog, dako ang nabulig sini agud malampuwasan sang mga mangunguma ang mga pagpanghangkat nga dala sang nagligad nga El Niño phenomenon.
Nahibaluan nga bangud man sa pagpatuman sang “wetting and drying method,” naglab-ot sa pito ka tonelada kada ektarya ang naani sang mga mangunguma.
Suno kay Limpangog, nakita nila nga mas epektibo ang husto nga pagdumala sang tubig sa humayan bangud ang sobra ang indi man maayo.
Aminado man ang presidente sang grupo nga may lugar nga indi malab-ot sang irigasyon.
Apang pila na diri ang nabutangan sang solar agud nga mabuligan ang pagpatubig sa mga uma.
Samtang nagpanugyan man si Limpangog sa mga uma nga indi malab-ot sang patubig ukon irigasyon nga indi lang anay magtanum sang humay.
