Nagtaliwan na ang veteran Filipina actress kag humanitarian nga si Rosa Rosal sa edad nga 97 anyos.
Ini gin-anusnyar sang Philippine Red Cross sa pagdumdum sang humanitarian efforts kag bulig sini bilang miyembro sang board of governors sang PRC.
Kilala si Rosal sa mga role sini sa Philippine cinema lakip na ang Himala ng Birhen sang 1947, Anak Dalita sang 1956, Badjao sang 1957, Biyaya ng Lupa sang 1959 kag Esperanza: The Movie sang 1999.
Nakabaton si Rosal sang Best Actress award halin sa Filipino Academy for Movie Arts and Sciences (FAMAS) sang 1955 sa role sini sa “Sonny Boy” kag FAMAS International Prestige Award sa “Anak Dalita” sang 1956.
Nagdaog man ang Anak Dalita sa best picture sa Asian Film Festival sang Hong Kong nga nakakuha sang Presidential Citation halin kay late President Ramon Magsaysay.
Kilala man si Rosal sa bulig sini sa Philippine Red Cross, kun sa diin siya nangin volunteer member sa blood program humalin sang 1950s kag gin-eliher sa Board of Governors sang 1965.
Wala nag-untat sa pagpromote si Rosal sa blood donation, kag pagpasanyog sang Red Cross facilities, hospitals, kag clinics.
