Filipina singer Gwyneth “Gwyn” Dorado, sulod sa final top 4 sang singing contest sa South Korea

Ginpabilib sang Filipina singer nga si Gwyneth” Gwyn” Dorado ang mga judges sang South Korean singing contest nga “Sing Again 4” sa diin nalakip sa final top four ang 22-anyos nga Filipina.

Si Gwyneth ang nagpanguna sa kompetisyon matapos makakuha sang pinakamataas nga score sa ika-12 nga episode sang programa nga ginpasalida sang Disyembre 30, 2025.

Sa isa ka video nga gin-upload, nagbilib ang mga judges kag viewers sa performance sang singer sang ginkanta nga “I Want You,” nga naghatag sa iya sang total score nga 789 — ang contestant nga nakakuha sang pinakamataas nga score sa episode.

Pito ka mga judges ang naghatag sa iya sang perfect score, nga nakarekord sang pinakamataas nga judges score sa kasaysayan sang kompetisyon.

Patigayunon ang finals sa Enero 6, sa diin mahibaluan na ang grand winner.

Samtang, una nga nakilala si Gwyn sang nagapang-edaron pa lang ini sang 10 ka tuig nga nagpasakop sa una nga season sang Asia’s Got Talent sang Marso 2015, antes ini gin-tag bilang ‘Dorado’ sa Korea.