Ginpahayag sang isa ka Filipino sa Mexico nga nakalantaw mismo sang coronation night sang Miss Universe 2024 nga masadya kag kanami sang feeling ang paglantaw sang live kun ikumparar sa television.
Suno kay Jerson Andreco, Bombo International News Correspondent direkta sa Mexico, nakalantaw sila sa venue kun sa diin madamo ang nagpakita sang suporta kay Miss Universe Philippines Chelsea Manalo.
Suno kay Andreco, naobserbahan sini nga antes pa man ang coronation night sang Miss Universe kahapon, madamo ang nagacheer kag mataas ang energy sang mga supporters sang Miss Philippines apang sang wala na ini nalawagan sa Top 12, ang palibot ang nagkalma na.
Ang ticket agud nga makalantaw sila sang Miss Universe coronation ang ginbakal nila paagi sa online.
Kahapon, Ginkoronahan bilang Miss Universe 2024 si Victoria Kjær Theilvig sang Denmark.
Nagpangibabaw ang katahom sang 21 anyos nga si Victoria sa 125 ka mga delegates sa coronation night nga ginpatigayon sa Arena CDMX sa Mexico City.
Ginpasuksok naman kay Victoria ang first-ever Filipino-made crown nga himo sang international jewelry brand nga Jewelmer sa diin makita ang South Sea Pearls sang Pilipinas.
Ginpasa naman ni Sheynnis Palacios sang Nicaragua ang korona.
Nalakip naman sa Top 5 sanday 1st runner-up: Nigeria – Chidimma Adetshinaa; 2nd runner-up: Mexico – Maria Fernanda Beltran; 3rd runner-up: Thailand – Opal Suchata Chuangsri; 4th runner-up: Venezuela – Ileana Marquez.
Samtang, tubtob lang sa Top 30 ang pambato sang Pilipinas nga si Chelsea Manalo.
Apang, napilian naman si Chelsea bilang Miss Universe Asia, isa sa mga Four Continental Queens sang Miss Universe.
