Madinalag-on nga napatigayon ang fire and earthquake simulation exercise sa Bacolod City Government Center kahapon.
Sa interview sang Bombo Radyo Bacolod kay Bureau of Fire Protection – Bacolod City Spokesperson Fire Officer 1 Paul Servano, kaupod sang BFP – Bacolod sa aktibidad ang mga fire volunteer groups, Bacolod City Disaster Risk Reduction and Management Office, kag iban pa nga mga rescue groups upod sa mga empleyado sang BCGC.
Suno kay Servano, masami kun may nagaluntad nga linog, may kasunod man nga sunog.
Gani ini ang ila ginapreparahan pinaagi sa pagpatigayon sang simex para sa fire and earthquake emergencies.
Gin-athag naman ni Servano nga indi dapat iring ang fire alarm sa tion sang linog, sa baylo ini ang paandaron lamang kun may magluntad nga sunog.
Sa drill, ginatudlo ang basic duck, cover and hold, kag matapos sang pagtay-og amo pa lamang ang pag-evacuate.
Pahanumdom sini nga indi pwede nga itudlo ang dapat nga himuon sa tion na sang katalagman, kundi dapat nakapreparar sang temprano.
Ang pagpatigayon sang earthquake drill ang requirement naman sa renewal sang business permit.
Kun sa mga opisina sila ang nagapatigayon sang simex, may-ara naman sang lectures sa mga eskwelahan, kag exit drill in the home para sa mga yara sa puluy-an.
Ini agud nakahibalo man ang mga pumuluyo sa mga dapat himuon kun may-ara sang linog kag sunog.
