Bukas nga ginpahayag sang Spanish national nga member sa Philippine National Football Team nga Azkals Bienvenido Maranon nga nagasuporta ini sa pambato sang Spain para sa FIFA World Cup 2022 nga maga-umpisa sa Nobyembre 21.
Aminado si Maranon, 38 anyos nga mangin mabudlay ang paghampang sang ila nga pungsod sa nagahilapit nga kompetisyon ilabi na nga tuman ka init ang temperatura sa Qatar.
Apang ginalauman gihapon sini nga sa ulihi, ang Spain amo ang mangin madinalag-on.
Magluwas sa Spain, pila sa mga balantayan santo diri amo ang team sang France, Germany, Agentina kag Brazil.
Ginabantayan man sini ang hampang nanday Lionel Messi sang Argentina, Neymar da Silva Santos Jr ukon Neymar sang Brazil kag Kylian Mbappe sang France nga amo ang pinakadalagko nga pangalan sa patag sang football.
Bangod wala sang dako gid nga player ang Spain nga mahimo makatuga sang pagbag-o, ginalantaw ni Maranon nga ang kadalag-an sang mga ini ang magadepende sa teamwork.
Sa pihak nga bahin, indi naman ini makapadulong sa Qatar sa 2022 FIFA World Cup, kag sa cellphone na lamang magalantaw.
Ini bangod siya ang mangin busy sa training ilabi na nga may patigayunon nga friendly game ang AZKALs sa Disyembre.
Si Maranon ang pito na ka tuig sa Pilipinas, kag sang tinalikdan nga Disyembre siya ang opisyal naman nga nangin naturalized Filipino.
Paathag sini nga igahatag sini ang tion para magpadayun sa training agud mahatag ang best performance para sa pungsod.
