Napuno sang hugyaw ang Panaad Park and Stadium sa ciudad sang Bacolod matapos nga nagchampion ang football team sang Negros Occidental Secondary Level sa championship game batok sa Capiz kagab-i sa nagapadayon nga Western Visayas Regional Athletic Association (WVRAA) Meet 2024.
Nangin masadya ang hampang kag una na nga naghinugyaw ang mga tumalan-aw sang nakascore sang duha ang team sang Negros Occidental sa first half sang hampang.
Nagpadayon ang pag-init sang hampang sa second half kun sa diin nagdugang pa sang tatlo ka goal ang team sang Negros Occidental.
Gintinguhaan man sang Capiz nga makagoal apang wala ini makalusot sa mabakod nga opensa sang host post province sang WVRAA 2024.
Natapos ang hampang sa score nga 5-0 pabor sa Negros Occidental.
Apang sa pihak sang kadalag-an, nagapangasubo naman ang football players sang Negros Occidental Elementary level matapos nga sila ang malutos sa Iloilo sa score nga 3-0.
